அகதிகளில் நிரம்பி வழியும் மட்டக்களப்பு

நாரதர்

‘அய்யோ பகலில் கேட்கும் மல்ரி பெரல் (Multi Barrel) வெடிச் சத்தங்களினால் என் நெஞ்சே வெடித்து விடும் போலிருக்கிறது.அய்யோ பாவம் மட்டக்களப்பு சனங்கள்.” என கடந்த வாரம் மட்டக்களப்பு சென்று வந்த இளம் யுவதியொருவர் இவ்வாறு புலமபுகின்றார்.

இலங்கையின் கிழக்கில் விடுதலைப் புலிகளுக்கும் அரசாங்கத்திற்குமிடையில் இடம்பெற்று வரும் உக்கிரத்தாக்குதல்களினால் சுமார் ஒரு லட்சத்து முப்பதாயிரத்திற்கும் அதிகமான குடும்பங்கள் மட்டக்களப்பு நகரத்தில் அகதிகளாக தஞ்சமடைந்துள்ளனர்.

இவர்கள் படும் துன்பங்களையும் நெருக்கடிகளையும் வார்த்தைகளில் சொல்லமுடியாதளவிற்கு எல்லை மீறிச் செல்கின்றது.இது அம்மக்கள் மீது ஏற்பட்ட இரண்டாவது சுனாமியாகும்.

ஐக்கிய நாடுகள் சபையினர் கூட இம்மக்களுக்கு போதுமானளவு உணவுகளை வழங்க முடியாதுள்ளதென தெரிவித்து வருகின்றனர்.

கடந்த இரு தசாப்த காலங்கள் இடம்பெற்ற யுத்தத்தினால் பல கசப்பான சம்பவங்களுக்கு முகம்கொடுத்தும் இன்னும் யுத்தத்தின் மீது இரு தரப்பும் ஆர்வம் கொள்வது நாட்டை மேலும் சீரழிவிற்கே இட்டுச் செல்லும்.

நவீன உலகில் மக்கள் இன்னோரன்ன நன்மைகளையும் சுதந்திரங்களையும் அனுபவித்து வருகின்ற வேளையில் இலங்கை வாழ் தமிழர்கள் மட்டும் அதளபாதாளத்தை நோக்கிச் செல்கின்றனர்.

தற்போதைய சூழ்நிலையில் இலங்கை வாழ் தமிழ் மக்களுக்கு எவராலுமே உத்தரவாதமில்லாத நிலையில் வாழ்ந்து வருகின்ற நிலையில் மட்டக்களப்பு நகரில் நிரம்பி வழியும் அகதிகள் மீது சம்பந்தப்பட்ட தரப்பினர்கள் பாராமுகத்துடன் இருப்பதொன்றும் வியக்கத்தக்க விடயமல்ல.

மல்ரி பெரல் மூலம் ஒரு தடவை தாக்குதல் நடத்துவதற்கு மட்டும் நான்கு லட்சம் ரூபா செலவிடப்படுகிறது.இது போல் பல தாகுதல்கள் ஒரு நாளைக்கு கிழக்கில் மேற்கொள்ளப்படுகிறது.இதற்கு மேற்கொள்ளப்படும் செலவை மட்டக்களப்பில் நிரம்பி வழியும் அகதிகள் மீதும் கரிசனை காட்டலாமல்லவா?